Yn 1989 giet Johannes van IJs oan de slach by V.V. Oosterlittens. Hy sil 6 seizoenen trainer wêze by de Littensers. Al gau docht bliken dat Van IJs in fuotbaljende trainer is. Dat hat tiid nedich, de earste 2 seizoen eindigt Littens dan ek op in 7e en 8e plak. It tredde seizoen giet it al in stik better en wurdt Littens 5e. Seizoen 1993-1994 is it beste seizoen fan Johannes van IJs, en wurdt Littens knap 2e yn de kompetysje, mei û.o. de legedaryske 5-6 oerwinning by OSI ’78 yn Ljouwert. Spitigernôch levert dit gjin promoasje op. Nei it seizoen 1994-1995 nimt Van IJs ôfskie fan Littens. Hy wie dêrnei noch 1 seizoen trainer yn syn wenplak Arum.
Neist dat Van IJs in fuotbaljende trainer wie, wie hy ek altyd posityf, freonlik, hie hy altyd belangstelling foar alle spilers, staf en fêste supporters, foar de thússituaasje, by jonge spilers ynformearje oer de stúdzje, ensfh. Hy wie altyd tige enthousiast en brocht dat ek oer op de spilers. At Van IJs dan nei hûs gong, noch efkes by alle spilers lâns en harren noch in goede snein tawinskje. “En tiisdei gean we wer lekker trainen, mannen!” Troch de neamde eigenskippen wie Van IJs in tige wardearre trainer en klupman fan V.V. Oosterlittens.
Neist trainer fan Littens en V.V. Arum (mar leafst 18 seizoenen) wie Van IJs ek trainer fan û.o. Mulier, Stormvogels’64, Trynwalden en Dronryp. Mei altyd syn frou Fetsje as steun neist him. Sy is spitigernôch yn 2015 ferstoarn. Tegearre wienen se ek noch oanwêzich op it 75-jierrich jubileum fan V.V. Oosterlittens yn 2010.
Wy winskje de famylje de kommende tiid in hiel soad sterkte ta mei dit ferlies.
V.V. Oosterlittens.
Jubileumwedstriid 2010 tsjin âld S.C. Heerenveen
Hjir noch yn aksje yn tarieding op jubileumwedstriid 2010
Seizoen 1991-1992
Seizoen 1992-1993
